សៀមរាប៖ ក្នុងព្រឹត្តិការណ៍សមរាត្រី ឬថ្ងៃរះចំកំពូលប្រាសាទអង្គរវត្ត មានភ្ញៀវទេសចរទៅទស្សនាដល់ទៅជាង៦ពាន់នាក់ ពីរឆ្នាំក្រោយផ្ទុះជំងឺកូវីដ-១៩។
បើតាមអគ្គនាយករងអជ្ញាធរជាតិអប្សារា លោក ឡុង កុសល បានឲ្យដឹងថា តាមការប៉ាន់ស្មានរបស់មន្ត្រីជំនាញ នៅក្នងថ្ងៃទី២១ ខែមីនា ឆ្នាំ២០២២ថា បើទោះបីចំនួននេះច្រើនជាងចំនួនភ្ញៀវដែលបានចូលមកទស្សនាប្រាសាទអង្គរវត្តរាល់ថ្ងៃក៏ពិតមែន ប៉ុន្តែវាមានចំនួនតិចនៅឡើយបើប្រៀបធៀបទៅនឹងឆ្នាំកន្លងទៅ។
លោកបន្តទៀតថា៖ «បើនិយាយពីរឿងចំនួននេះ គឺវាតិចជាងមុនឆ្ងាយណាស់ ជាពិសេសគឺភ្ញៀវបរទេស បើកាលពីមុនគឺច្រើនណាស់ ប៉ុន្តែដោយសារស្ថានភាពអញ្ចឹងទៅ (ស្ថានភាពជំងឺកូវីដ១៩) គឺមិនបានច្រើនទេ»។
ជាមួយគ្នានេះ លោកបន្ថែមថាប្រសិនបើស្ថានភាពនៃជំងឺកូវីដ-១៩ មានលក្ខណៈល្អប្រសើរជាងនេះ ជាពិសេសគួបផ្សំជាមួយការដកចេញនូវលក្ខខណ្ឌផ្សេងៗសម្រាប់ភ្ញៀវទេសចរ នោះគេនឹងមានការសង្ឃឹមថានឹងមានភ្ញៀវទេសចរចូលមកលេងប្រទេសកម្ពុជា ជាពិសេសគឺនៅប្រាសាទអង្គរវត្តក្នុងព្រឹត្តការណ៍ សមរាត្រីនៅខែកញ្ញាខាងមុខនេះម្ដងទៀត។
តាមអ្នកជំនាញអាជ្ញាធរជាតិអប្សរា ព្រឹត្តិការណ៍សមរាត្រីនៅឆ្នាំនេះ កើតឡើងចំថ្ងៃទី២១ ខែមីនា ឆ្នាំ២០២២នេះ ដែលគេអាចមើលថ្ងៃរះចំកំពូលកណ្ដាលប្រាសាទអង្គរវត្ត ប្រសិនបើអាកាសធាតុអំណោយផលល្អ។
ត្បិតឆ្នាំនេះ មានពពកបិទបាំងបន្ដិចក្ដី តែគេនៅអាចមើលឃើញព្រះអាទិត្យពណ៌ក្រហមស្រាល រះឡើងចំណុចកណ្ដាលកំពូលប្រាសាទ ហើយទេសចរបង្ហាញការសប្បាយរីករាយជាខ្លាំង៕